Tolosaldeko Mankomunitatea

Albisteak

2013|06|07

Ekainaren 17an jarriko da martxan Alegia, Anoeta, Irura eta Zizurkilen hondakinen atez ateko bilketa sistema

Alegia | Anoeta | Irura | Zizurkil

Ekainaren 17tik aurrera, Anoeta, Alegia, Zizurkil eta Iruran aro berri bati ekingo diote. Tolosaldean badira beste zenbait herri, lehenagotik ere euren hondakinen kudeaketan aldaketak egin dituztenak, helburua beti bera izanik: hondakinak egoki sailkatu, eta beraz, birziklapen datuak ahalik eta altuenera eramatea. Zero zabor herri diren Orendain, Elduain eta Orexarekin batera, Tolosaldearen mapan, beste lau puntu berde margotuko dira laister.
Alegia, Anoeta, Irura eta Zizurkilek, gaurkoan, oraindela hilabete batzuk hasitako bidean beste pauso bat emango dute. Atez ateko bilketa martxan jartzearekin batera, euren herritarren ongizatean salto kualitatibo eder bat emango baitute.
Atez atekoa da birziklatzeko orduan arrakastarik handiena ematen duen sistema. Helburua zera dela dio Amaia Azkuek: Bilketa pertsonalizatu egoki baten bidez, eredu iraunkorragoa lortzea, beti ere, ingurumen irizpideak nahiz irizpide sozial, tekniko eta ekonomikoak lehenetsiz.
 
Mankomunitateko ordezkariak azaldu moduan, egun, Tolosaldeko herrietako birziklatze tasa %30aren bueltan badabil, 50 puntu inguruko aldea egitera doaz herri hauetan. Datuak iraultzeko garaia heldu dela ziurtatu du, eta urrats hori, herritarrei esker irmo bezain gogotsu emango dutela zihurtatu dute herriek..
 
Gipuzkoan jada 9 herri dira hondakinak atez ate biltzen dituztenak, eta honako herri hauek hastearekin, 13 izango gara dagoeneko eta etorkizunean, Villabonak bezalaxe, beste hainbat herrik ere hartuko dute herri hauek luzatzen dien lekukoa. Alegia, Anoeta, Irura, Zizurkil, Tolosaldea, ederragoa eta jasangarriagoa egitea dute helburu, eta denen artean, Gipuzkoa hobe, ederrago eta osasuntsuago
bat lortzeko nahia erakutsi dute.
 
Ekainaren 17tik aurrera hondakinak atez ate jasotzen hasiko dira lau herri hauetan. Frogatuta dagoelako gaikako bilketa %80etik gorako emaitzetara iristeko gai den sistema bakarra dela. Atez atekoak ohituretan aldaketaren bat ekarriko duela, baina adierazi dutenez, guztiengan erabateko konfiantza dute eta ziur daude, zailtasun handirik gabe, herritarrak sistema berrira moldatuko
direla. Atez Atekoa zuzen zuzenean benetan zer den egiaztatuko dela behingoz, eta aldaketa hau hoberako izango dela ziurtatu dute. Denen esfortzu txikiarekin, ondorengoei oraingoa baina mundu hobeagoa uzteko ekarpen txikia egingo dela azpimarratu dute.
 
Ingurumenarekiko errespetua, oraingo eta ondorengo herritarren ongizatea helburu izanda eta irizpide ekonomikoak oinarri hartuta, hondakinen kudeaketan aurrerapausoak ematen ari dira. Egin beharreko bidea hau dela ziur daudelako eta gaizki egiteko aukerak txikitu eta ongi egiten hasteko garaia
delako. Beraz, atez atekoari aukera bat emateko eskatu dute. Gainera, Amaia Azkuek azaldu duenez, hemendik 6 hilabetera, parte hartze prozesu baten bidez, emaitzak aztertu, herritarren asebetetzea ezagutu, eta beharrezko moldaketak egingo dituzte Udalek herritarrekin.
 
Tolosaldeko Mankomunitatetik argi dute herritarrekin eta herritarrentzat egin behar dela lurralde garbi, jasangarri eta iraunkorrak eraikitzeko bide hau. Honetarako, herritarrei dei egien die kubo sortak eta gidak jasotzera joateko.
 
Bilketa egiteko beharrezkoak diren edukiontzien banaketa egiten hasita daude dagoeneko: Alegian jada kuboen % 90 banatuta daude. Anoeta, Irura eta Zizurkilen asteburu honetan izango dira banaketa hitzorduak, eta seguru agertu dira, Alegian izandako arrakasta errepikatuko dela herri hauetan ere. Laur
herrien artean, 3000 etxebizitzetako kuboak banatuko dituzte. 
 
Azkuek adierazi moduan, “guztion parte hartzea beharrezkoa da atez ateko ereduak funtziona dezan, eta ziur gaude, orain artean bezala, herritarren gehiengoak euren sostengua emango diola. Atez atekoari aukera bat ematea eskatzen dugu, ezagutu dezagun“.
 
Mahaitik konfiantza guztia erakutsi dute denen artean ederki egingo dela. Gogotsu eta ilusioz, guztion artean eskualde ederrago bat margotzeko deia luzatu dute. 

 

Iruzkinak

  • 2013|06|18 15:39:32 | Anoetatik: Mila esker!
    Idatziko diet ba.
    Ondo izan ta animo!
  • 2013|06|18 14:02:00 | Tolosaldeko Mankomunitatea: Kaixo,
    herri bakoitzaren kasuan sortu daitezkeen zalantza edo arazoen aurrean erantzun zehatzak eman ahal izateko, hoberena bertako informazio bulegoko hezitzailearekin harremanetan jartzea izango duzue. Anoetako kasuan, telefono zenbakia:661559757 edota anoeta@tolosaldekomankomunitatea.eus -era idatziz jarri harremanetan. Edozein kasuri soluzioa emateko prestutasuna dugu denok, eta ziur gaude zuen kasuan ere eskainiko dela ongi datorkizuen irtenbiderenbat. Eskerrik asko!
  • 2013|06|17 17:27:29 | Anoetatik: Kaixo! Zenbait zalantza dauzkat:
    - Kuboekin batera eman dizkiguzuen poltsa biodegradableak bukatzean zer egin behar dugu? Tolosaldetik kanpo lan egiten det eta goizetan ezinezkoa zait udaletxetik pasatzea.

    - Ze aukera dago larunbatetan kanpoan egonez gero errefusa ateratzeko (kontuan izanda bulego ordutegian ere ezin dugula harreta gunetik pasa larrialdegunerako giltza eskatzera...)

    Badakit zaila dela, baina pentsatu duzue aukeraren bat bulego ordutegian udaletxera joateko aukerarik ez dutenentzat? Ez dakit, taberna-denda laguntzaileak edo...

    Mila esker!
 

Iruzkina egin

CSS | XHTML | WAI-A | Lege oharra | Irisgarritasuna | Kontaktua | Diseinua eta garapena iametza interaktiboa